Meta компани хэрэглэгчийн өмнөөс өдөр тутмын олон төрлийн цахим ажлыг гүйцэтгэх зориулалттай “Muse” нэртэй шинэ хиймэл оюуны агентаа танилцуулжээ. Тус агент нь цахим шуудан илгээх, аялал захиалах, худалдан авалт хийхээс гадна хэрэглэгчийн урт хугацааны зорилгыг хэрэгжүүлэхэд туслах боломжтой гэж компанийн зүгээс мэдээлсэн байна.
Meta “Muse”-ийг олон нийт өргөнөөр ашиглахад зориулагдсан, аюулгүй байдал болон нууцлалд төвлөрсөн AI агент хэмээн тодорхойлжээ.
Өөрийн веб хөтөч, тусгай виртуал орчинтой
“Muse” нь өөрийн веб хөтөчтэй бөгөөд “Muse Secure VM” нэртэй тусгай виртуал машин дээр ажилладаг байна.
Уг орчинд AI агентын ашиглах мэдээлэл болон хэрэглэгчийн холбосон үйлчилгээний нэвтрэх мэдээллийг хамгаалалттай хадгалах аж. Ингэснээр агент цахим хуудсуудыг нээх, онлайн маягт бөглөх, хэрэглэгчийн өгсөн даалгаврыг шат дараатай гүйцэтгэх боломжтой болжээ.
Хэрэглэгч “Muse”-тэй тусгай аппликейшн болон WhatsApp-аар дамжуулан харилцаж болно.
Гэхдээ цахим шуудан илгээх, худалдан авалт баталгаажуулах зэрэг хэрэглэгчийн өмнөөс бодит үйлдэл хийхээсээ өмнө тухайн хүнээс зөвшөөрөл авах зарчимтай гэж Meta тайлбарласан байна.
Аппликейшнийг хаасан ч ажлаа үргэлжлүүлнэ
“Muse”-ийн гол онцлогуудын нэг нь хэрэглэгч аппликейшнийг хаасан ч өгсөн ажлыг үргэлжлүүлэн гүйцэтгэх боломжтойд оршиж байна.
Даалгаврын явцад нөхцөл өөрчлөгдөх, эсвэл хэрэглэгчээс нэмэлт зөвшөөрөл шаардлагатай болсон үед агент эргэн мэдэгдэх боломжтой аж.
Мөн өмнөх харилцан ярианы мэдээллийг ашиглан тухайн хэрэглэгчид илүү тохирсон санал гаргах боломжтой гэж Meta мэдэгджээ.
Жишээлбэл, Instagram-д хадгалсан хоолны жорыг автоматаар хүнсний бүтээгдэхүүний худалдан авах жагсаалт болгон хувиргаж болно. Мөн хэрэглэгч оройн зоогт зочид урихаар төлөвлөж байвал өмнөх сонирхол болон хадгалсан мэдээлэлд нь тулгуурлан тохирох хоолны цэс санал болгох боломжтой байна.
Ямар аппликейшнд нэвтрэхийг хэрэглэгч өөрөө шийднэ
Meta-ийн мэдээлснээр “Muse” ямар аппликейшн, үйлчилгээнд хандах, ямар төрлийн зөвшөөрөл авахыг хэрэглэгч өөрөө удирдах боломжтой.
Хэрэглэгч хүссэн үедээ өгсөн нэвтрэх эрхээ өөрчлөх эсвэл бүрэн цуцалж болно. Түүнчлэн тодорхой мэдээллийг мартахыг агентаас хүсэх боломжтой аж.
Мөн “Muse”-тэй хийсэн харилцан үйлдлээ Meta-ийн AI загваруудыг сургахад ашиглуулахгүй байх сонголт хэрэглэгчдэд нээлттэй байна.
Компанийн мэдээлснээр “Muse”-тэй хийсэн харилцан яриа болон виртуал машинд хадгалсан мэдээллийг Meta-ийн зар сурталчилгааны системтэй хуваалцахгүй байх бодлого баримталжээ.
Худалдан авалт хийхдээ Stripe-ийн Link үйлчилгээг ашиглана
“Muse” цахим худалдааны үед Stripe компанийн хөгжүүлсэн Link төлбөрийн үйлчилгээг ашиглах боломжтой байна.
Meta-ийн мэдээлснээр “Muse” нь Link-ийн худалдан авалтын хамгаалалтад хамрагдсан анхны AI агент болжээ. Энэхүү хамгаалалт нь бараа гэмтсэн, хүргэлтийн явцад гээгдсэн, үнэ буурсан болон буцаалттай холбоотой зарим төрлийн нөхөн олговрыг хамардаг байна.
Цаашид Shop Pay болон 1Password үйлчилгээг мөн “Muse”-тэй холбохоор төлөвлөжээ.
Ийнхүү Meta шинэ AI агентаараа хэрэглэгчтэй зөвхөн чатлах бус, бодит онлайн ажлуудыг тэдний өмнөөс гүйцэтгэх чиглэл рүү хиймэл оюуны хэрэглээг өргөжүүлэхээр зорьж байна. Харин ийм систем өргөн хэрэглээнд нэвтрэх тусам зөвшөөрөл, нууцлал болон дансны аюулгүй байдлыг хэрхэн хэрэгжүүлэх нь хамгийн чухал асуудлуудын нэг хэвээр байх юм.
