OnePlus шинэ үеийн флагман смартфоныхоо талаар мэдээллийг үе шаттайгаар дэлгэж эхэллээ. OnePlus 16 нь зөвхөн өндөр хүчин чадлаар бус, өдөр тутмын хэрэглээнд мэдэгдэхүйц өөрчлөлт авчрах хэд хэдэн шинэ шийдлээрээ ялгарах төлөвтэй байна.
OnePlus China-ийн ерөнхийлөгч Li Jie Louis-ийн мэдээлснээр компанийн энэ удаагийн гол анхаарал дэлгэцийн дөрвөн талын хэт нимгэн хүрээнд төвлөрчээ.
Дэлгэц нь хавтгай хэвээр үлдэнэ
OnePlus 16-ийн дэлгэц өмнөх загваруудын адил хавтгай байх ч булангуудыг илүү зөөлөн дугуйлсан хэлбэртэй хийхээр болжээ.
Ингэснээр смартфоныг удаан хугацаанд гартаа барих үед илүү эвтэйхэн болохоос гадна сошиал сүлжээ гүйлгэх, видео үзэх болон тоглоом тоглох үед тав тухтай байдлыг нэмэгдүүлэх зорилготой аж.
Ялангуяа landscape буюу хэвтээ горимд тоглоом тоглох үед том радиустай булангууд гарын алганд илүү эвтэйхэн суух ёстой гэж OnePlus үзэж байна.
Тусдаа программчлагддаг товчлууртай болно
OnePlus 16-ийн хамгийн сонирхолтой шинэчлэлүүдийн нэг нь тусдаа программчлагддаг хурдан хандалтын товчлуур байх юм.
Хэрэглэгч уг товчлуурт ес хүртэлх өөр үйлдэл оноох боломжтой болжээ. Тухайлбал:
- дууг шууд хаах;
- гар чийдэн асаах;
- дуу бичлэг эхлүүлэх;
- бусад хурдан үйлдлийг нэг даралтаар ажиллуулах боломжтой.
Ингэснээр смартфоныг нэг гараараа барьж байх үед ч шаардлагатай функцийг хурдан идэвхжүүлэх боломжтой болох юм.
Металл хийц флагманы мэдрэмжийг нэмэгдүүлнэ
OnePlus шинэ загварынхаа premium төрхөд ч анхаарчээ.
Камерын эргэн тойронд металл элемент ашиглахаас гадна төхөөрөмжийн дунд хүрээг мөн металлаар хийхээр төлөвлөсөн байна.
Энэ нь OnePlus 16-ийн хийц, мэдрэмжийг илүү өндөр зэрэглэлийн флагман төхөөрөмжтэй ойртуулах зорилготой аж.
165 Гц дэлгэцтэй худалдаанд гарна
OnePlus өмнө нь шинэ загварын дэлгэц дэлхий даяар 165 Гц хүртэлх refresh rate дэмжинэ гэдгийг баталсан.
Өндөр refresh rate нь интерфэйсийн хөдөлгөөн, тоглоом, scroll хийх үед илүү жигд дүрслэл өгөх боломжтой.
Мөн OnePlus 16 нь ColorOS 17 үйлдлийн системтэйгээр худалдаанд гарахаар төлөвлөгджээ.
OnePlus 16 аравдугаар сард танилцуулагдана
OnePlus 16-ийг Хятадад аравдугаар сард албан ёсоор танилцуулах хүлээлттэй байна.
Энэ удаад OnePlus ганцхан хүчирхэг үзүүлэлтээр бус, дэлгэцийн хүрээ, эргономик, материалын сонголт, хурдан хандалтын товчлуур, өндөр refresh rate зэрэг өдөр тутамд мэдрэгдэх олон жижиг сайжруулалтыг нэг дор оруулахыг зорьжээ.
