Ухаалаг гар утасны зах зээл олон жилийн турш ижил төстэй хэлбэртэй моноблок загваруудаар дүүрсэн. Харин сүүлийн жилүүдэд эвхэгддэг, “flip” төрлийн төхөөрөмжүүд дахин эрэлттэй болж, хуучны танил загварыг орчин үеийн технологитой хослуулсан шинэ ангилал болон хүчтэй хөгжиж байна.
Өнөөдөр эвхэгддэг смартфон сонгох нь зөвхөн загварын чиг хандлага дагах асуудал биш болжээ. Зарим хэрэглэгчийн хувьд авсаархан байдал, барихад эвтэйхэн хийц болон нэмэлт дэлгэцийн боломж зэрэг нь өдөр тутмын хэрэглээнд бодит давуу тал болж байна гэж SlashGear онцолжээ.
Эвхэгддэг төхөөрөмжийн эрэлт яагаад нэмэгдэв
Эвхэгддэг утас хэт эмзэг, эсвэл боломж нь хязгаарлагдмал гэх ойлголт хэрэглэгчдийн дунд байсаар ирсэн. Гэвч шинэ үеийн материал, нугасны механизм болон дэлгэцийн технологийн сайжруулалт нь эдгээр төхөөрөмжийн найдвартай байдлыг мэдэгдэхүйц нэмэгдүүлжээ.
Мөн сонголт ч өргөжсөн байна. Samsung-ийн дээд ангиллын загваруудаас гадна илүү боломжийн үнэтэй хувилбарууд зах зээлд нэмэгдэж, эвхэгддэг төхөөрөмжийг илүү олон хэрэглэгч сонирхох нөхцөл бүрджээ.
Эвхэгддэг утасны гол давуу талуудын нэг нь авсаархан хэмжээ юм. Нугалсан үед төхөөрөмж жижиг, зузаан картын багцтай төстэй хэмжээтэй болж, жижиг халаас болон цүнхэнд хийхэд илүү тохиромжтой болдог.
Мөн нэг гараар ашиглахад хялбар байдал нь зарим хэрэглэгчийн хувьд том давуу тал болж байна. Утсыг барихад эвтэйхэн хэмжээтэй болгосноор гарын бугуйд ирэх ачаалал багасах боломжтой.
Дизайны хувьд ч ялгарах тал бий. Ихэнх ухаалаг гар утас ижил хэлбэртэй болсон үед эвхэгддэг загвар нь гадаад төрхөөрөө шууд ялгарч, төхөөрөмжийг хаах хөдөлгөөн хүртэл хэрэглэгчдэд онцгой мэдрэмж төрүүлдэг байна.
Гадна дэлгэц нь үндсэн давуу тал болжээ
Орчин үеийн эвхэгддэг смартфонууд хуучны “flip phone”-уудаас хамгийн их ялгарах зүйл нь гадна талын бүрэн ажиллагаатай дэлгэц юм.
Энэ дэлгэцээр хэрэглэгч утсаа бүрэн нээхгүйгээр мессежид хариулах, хуваарь шалгах, хөгжмөө удирдах, зарим тохиолдолд видео үзэх боломжтой болжээ.
Samsung Galaxy Flip цувралын хэрэглэгчид тусгай программын тусламжтайгаар зарим аппликэйшнийг гадна дэлгэц дээр ажиллуулах боломжтой байдаг. Ингэснээр жижиг дэлгэц зөвхөн мэдэгдэл харах зориулалттай бус, өдөр тутмын олон үйлдлийг гүйцэтгэх тусдаа интерфэйс болж хөгжиж байна.
Зураг, видео авахад илүү уян хатан
Эвхэгддэг смартфоны бас нэг том давуу тал нь зураг, видео авах үедээ өөрөө тулгуур болж чаддаг явдал юм.
Нугасны механизмын ачаар төхөөрөмжийг ширээ болон бусад тэгш гадаргуу дээр тодорхой өнцгөөр байрлуулж болдог. Ингэснээр нэмэлт tripod эсвэл тавиургүйгээр өөрийн зураг, видео авах боломж нэмэгдэнэ.
Селфи хийхдээ гадна дэлгэцээр өөрийгөө харахын зэрэгцээ үндсэн камерын модулийг ашиглах боломжтой. Энэ нь ихэнх тохиолдолд урд камераас илүү өндөр чанартай зураг авах нөхцөл бүрдүүлдэг.
Мөн төхөөрөмжийг хагас нугалсан үед уламжлалт жижиг видео камер шиг барьж, бичлэг хийх боломжтой байдаг. Ийм байрлал нь зарим хэрэглэгчийн хувьд гарын хөдөлгөөнийг тогтвортой байлгаж, зураг авалтыг илүү тухтай болгодог.
Одоогоор эвхэгддэг смартфонууд дэлхийн ухаалаг гар утасны зах зээлийн ойролцоогоор 2 хувийг эзэлж байгаа ч энэ ангилал тогтвортой өсөж байна.
Үйлдвэрлэгчид ч хэрэглэгчдийн энэхүү сонирхолд хурдан хариу өгч, илүү бат бөх, хөнгөн, авсаархан бөгөөд боломжийн үнэтэй загваруудыг хөгжүүлсээр байна.
Ингэснээр эвхэгддэг смартфон нь зөвхөн сонирхолтой дизайнтай төхөөрөмж бус, орчин үеийн технологи, авсаархан хэмжээ болон өдөр тутмын хэрэглээний тав тухыг нэг дор хослуулсан бодит сонголт болон улам бүр түгээмэл болж байна.
