Apple-ийн хуучин смартфон худалдан авах нь мөнгө хэмнэх боломж мэт санагддаг ч тодорхой эрсдэл дагуулдаг гэж BGR мэдээлжээ. Тус хэвлэлийн тайлбарласнаар, iPhone нь хоёрдогч зах зээл дээр ч эрэлт өндөртэй хэвээр байдаг төхөөрөмжүүдийн нэг юм.
iPhone удаан дэмжлэг авдаг ч бүх загвар найдвартай биш
iPhone олон жилийн дараа ч чанараа харьцангуй сайн хадгалдаг бөгөөд программ хангамжийн шинэчлэлтийн дэмжлэгээрээ өрсөлдөгчдөөсөө давуу гэж үзэгддэг.
Гэсэн ч энэ нь ямар ч хуучин iPhone худалдаж авахад аюулгүй гэсэн үг биш юм. Зарим төхөөрөмж гаднаасаа сайн харагдавч iOS-ийн шинэ хувилбаруудыг хүлээн авахаа больсон байж болзошгүй.
Ийм тохиолдолд хэрэглэгч шинэ функц ашиглах боломжгүй болохоос гадна аюулгүй байдлын шинэчлэлт ч авахгүй байх эрсдэлтэй.
Зай, процессор элэгдсэн байх магадлалтай
Удаан хэрэглэсэн ямар ч смартфон цаг хугацааны явцад элэгддэг. Хуучин iPhone худалдаж авах үед хамгийн түрүүнд анхаарах зүйлсийн нэг нь батарейн байдал юм.
Зай олон жил ашиглагдсан бол цэнэгээ хурдан алдах, гэнэт унтрах, хүйтэнд тогтворгүй ажиллах зэрэг асуудал гарч болно.
Мөн төхөөрөмж олон жилийн турш өндөр ачаалалтай ажилласан бол процессор болон бусад дотоод эд анги элэгдсэн, ажиллагаа нь удааширсан байх магадлалтай гэж мэргэжилтнүүд анхааруулжээ.
Баталгаагүй төхөөрөмж авах эрсдэл өндөр
Хоёрдогч зах зээл дээр зарагдаж буй олон iPhone ихэвчлэн албан ёсны баталгаагүй байдаг. Энэ нь худалдан авсны дараа доголдол илэрвэл хэрэглэгч засварын зардлыг өөрөө бүрэн хариуцах нөхцөл үүсгэнэ.
Шинэ төхөөрөмж худалдаж авах үед баталгаа, үйлчилгээний дэмжлэг тодорхой байдаг бол хуучин утасны хувьд энэ хамгаалалт ихэнхдээ байхгүй.
Гар аргаар сэргээсэн iPhone их таардаг
BGR-ийн онцолсноор, зах зээл дээр гар аргаар сэргээсэн iPhone цөөнгүй байдаг. Ийм төхөөрөмжийг гаднаас нь харахад шинэ мэт болгосон ч дотор эд анги нь анхны чанартаа хүрэхгүй байж болно.
Зарим тохиолдолд хулгайлагдсан Apple утсыг албан ёсоор сэргээгдсэн төхөөрөмж мэтээр дахин худалдах оролдлого ч гардаг гэж сэтгүүлчид анхааруулжээ.
Иймээс “шинэ мэт”, “refurbished” гэх тайлбар бүхий зар бүрт итгэхээс өмнө төхөөрөмжийн гарал үүсэл, серийн дугаар, идэвхжүүлэлтийн түгжээ болон баталгааны мэдээллийг сайтар шалгах шаардлагатай.
Хуучин байх тусам цэнэг барилт мууддаг
Хуучин iPhone авахад хамгийн түгээмэл асуудал нь батарейн насжилт юм. Төхөөрөмж хэдий хуучин байна, зай нь төдий чинээ цэнэгээ муу барих магадлалтай.
Батарей солих боломж байдаг ч энэ нь нэмэлт зардал бөгөөд зарим тохиолдолд чанартай, албан ёсны эд анги ашигласан эсэх нь тодорхойгүй байж болно.
Тиймээс хуучин iPhone авах гэж байгаа бол батарейн эрүүл мэндийн үзүүлэлтийг шалгах нь зайлшгүй алхам юм.
Хуучин iPhone авах нь хуучин машин авахтай адил
BGR-ийн зохиогчид хуучин iPhone худалдан авахыг хуучин автомашин авахтай зүйрлэжээ.
Тэдний хэлснээр, хэрэглэгч юу хайж байгаагаа сайн мэддэг, төхөөрөмжийг зөв шалгаж чаддаг бол ашигтай үнээр сайн сонголт хийх боломжтой. Харин хангалттай мэдлэггүй, яаран шийдвэр гаргавал засвар, батарей, баталгаа, гарал үүслийн асуудал зэрэг олон хүндрэлтэй нүүр тулж болзошгүй.
Иймээс хуучин iPhone авахын өмнө загварын насжилт, iOS-ийн дэмжлэг, батарейн байдал, төхөөрөмжийн гарал, баталгаа, засварын түүхийг заавал нягтлахыг мэргэжилтнүүд зөвлөж байна.
