NASA-гийн Ангараг гарагийг судлагч роботын авсан зурагт хаданд гарсан хаалганы ам шиг харагдах нууцлаг тогтоц ажиглагджээ. Нисдэг биет судлаач үүнийг эртний соёл иргэншлийн үлдэгдэл байж магадгүй гэж таамагласан байна.
NASA-гийн Perseverance роботын Ангараг дээр авсан зураг харь гарагийн амьдралын тухай онол сонирхогчдын анхаарлыг татжээ. Зурагт чулуунуудын дунд нарийхан хаалганы амтай төстэй тогтоц харагдсан байна. Энэ талаар Daily Mail мэдээлжээ.
Нисдэг биет судлаач Скотт К. Уоринг зураг дээр өөрийнх нь хэлснээр эртний соёл иргэншлээс үлдсэн байж болох нэгэн төрлийн “портал” олж харсан гэж мэдэгджээ. Тэрээр мөн жижиг бараан нүхтэй, пирамид хэлбэрийн өөр нэг биетэд анхаарал хандуулсан байна.
Энэ зураг нь Perseverance робот 2021 оны 6-р сард, даалгаврынхаа Ангараг дээрх 107 дахь хоногт Mastcam-Z камераар авсан Езеро тогооны панорам зургийн нэг хэсэг аж. Олон тэрбум жилийн өмнө Езеро тогоонд нуур байсан гэж үздэг тул эрдэмтэд уг бүс нутгийг эртний бичил биетний амьдралын ул мөр хайхад ирээдүйтэй газар гэж тооцдог.
Гэсэн ч зурагт харагдаж буй эдгээр тогтоц хиймэл гаралтай гэдгийг нотлох ямар ч баримт одоогоор байхгүй байна. Уоринг мөн тэдгээрийн ойролцоох хэмжээг хэрхэн тогтоосноо тайлбарлаагүй аж. Үүнтэй төстэй таамаг өмнө нь Ангарагийн өөр нэг зурагтай холбоотойгоор гарч байжээ. 2022 оны 5-р сард Curiosity робот хаданд том хаалганы ам шиг харагдах тогтоцын зураг авсан юм.
Хожим нь уг тогтоц ердөө 30 см орчим өндөр болох нь тогтоогджээ. NASA тухайн үед ийм төрлийн нүх, завсар нь чулуулгийн ан цав, хагарал болон байгалийн элэгдлийн улмаас үүсэх боломжтой гэж тайлбарласан байна.
Уорингийн алга болсон соёл иргэншлийн ул мөр байж магадгүй гэсэн сүүлийн мэдэгдэлд NASA одоогоор тайлбар хийгээгүй байна.
