Наран дээр бүртгэгдсэн “Х1.1” ангиллын хүчтэй дэлбэрэлтийн дараа үүссэн плазмын урсгал Дэлхий рүү чиглэн ойртож байна. Үүний улмаас өнөөдөр буюу долдугаар сарын 2-ны орой соронзон шуурга үүсэх магадлалтай гэж мэдээлжээ.
Оросын ШУА-ийн Сансрын судалгааны хүрээлэнгийн нарны одон орон судлалын лабораторийн мэдээлснээр уг үзэгдэл G3 түвшинд хүрч болзошгүй байна.
Наран дээр хүчтэй дэлбэрэлт бүртгэгджээ
Зургаадугаар сарын эхнээс хойш Наран дээр бүртгэгдсэн хамгийн хүчтэй дэлбэрэлт нь Х1.1 баллын түвшинд хүрсэн талаар өмнө нь мэдээлсэн. Энэ дэлбэрэлтийн улмаас үүссэн плазмын үүл Дэлхий рүү чиглэн хөдөлж байгаа аж.
Нарны идэвхжил дундаж түвшинд байсан ч дэлбэрэлт болсон бүсүүд Нар-Дэлхийн шулуун чиглэлд байрлаж байгаа нь шуурганы нөлөөг илүү мэдэгдэхүйц болгох нөхцөл бүрдүүлж байна.
G3 түвшний хүчтэй шуурга болох магадлалтай
“Хэдийгээр Наран дээрх дэлбэрэлт нь дундаж хүчтэй байсан хэдий ч идэвхжилтэй хэсгүүд нь яг одоо Нар-Дэлхийн шулуун шугам дээр байрлаж байгаа тул Дэлхий рүү чиглэх шуурга нэлээд мэдрэгдэхүйц байх болно. Энэ удаад хамгийн дээд түвшний соронзон шуурга болон цацрагийн шуурга болох төлөвгүй байгаа бөгөөд, мөн дээд түвшний өмнөх шаталбар болох G4 түвшинд хүрэх магадлал бага байна. Гэсэн хэдий ч G3 (хүчтэй) ангиллын үзэгдэл болох магадлал өндөр байна. Түүнчлэн энэхүү шуурга нь энэ оны гуравдугаар сараас хойших хамгийн хүчтэй соронзон шуурга болох төлөвтэй байна” гэж уг мэдээлэлд дурджээ.
Мэргэжилтнүүдийн таамаглаж буйгаар энэ удаагийн соронзон шуурга хамгийн дээд түвшинд хүрэхгүй ч G3 ангиллын хүчтэй үзэгдэл болох магадлал өндөр байна. Ийм түвшний шуурга нь энэ оны гуравдугаар сараас хойш ажиглагдах хамгийн хүчтэй соронзон идэвхжил байж болзошгүй юм.
Плазмын үүл Дэлхийд хүрэх төлөвтэй байна
Нарны дэлбэрэлтийн дараа үүссэн плазмын үүл өнөөдөр буюу 2026 оны долдугаар сарын 2-нд Дэлхийн агаар мандалд хүрэх төлөвтэй байна. Үүнтэй холбоотойгоор оройн цагаар соронзон орны хэлбэлзэл эрчимжиж болзошгүй гэж үзэж байна.
